Vassendgutane til nordisk TV

NRK har valt ut denne filmen til utvekslinga dei har med tv-stasjonane i dei andre nordiske landa. Dokumentaren er laga av Terje Reite og Tor Sivertstøl i NRK Møre og Romsdal.

Mange såg programmet

Svært mange såg programmet då det gjekk på NRK1 og NRK2 tidlegare i vinter. Sjåartala hamna på langt over ein halv million, og programmet låg blant dei mest populære dei aktuelle sendedatoane.

Sjå heile programmet om Vassendgutane her

På turné

I programmet følgjer programskaparane Terje Reite og Tor Sivertstøl det populære bandet på turné på Sørvest-landet. Først er vi på Varhaug på Jæren, og deretter i Nordhordlandshallen i Knarvik nord for Bergen. På begge stadane herskar ei heftig, svett og intens fest-country-stemning.

Jordnære

I programmet får vi noko av svaret på kva som er årsaka til at Vassendgutane har hatt slik suksess. - Publikum er nesten som ein del av bandet, seier bandmedlemene. Vi står ikkje på scena og held avstand. Å vere på ein vassendgutanekonsert er om lag som å vere på ein fest der vi dreg opp til allsang. Forskjellen er berre at på ein Vassendgutane-konsert kan det vere over 3000 festdeltakarar, seier dei.

Norvisjonen

Programmet blir no utveksla i samarbeidet mellom dei nordiske stasjonane i Norvisjon-samarbeidet.